چوخداكی سوسموشام اییلمیشم من !!
هله داغلارین ووقاری واردیر
چوخدا قارداشیم سربستیر ایندی
هله زیندانین دوواری واردیر
*********************
هله ده یاساقدیر بو آنا دیلیم
هله ده بو قیفیل كیلیدسیز قالیب
ایگید ستارخانلار گئدندن بری
سانیرام یوردوموز ایگیدسیز قالیب
*****************
نه قدر های وئریرم های گلمیر منه
داغلار دییه سن قایتارمیر سسیمی
نه قدر باغیررام اوزگورلوك منه
گونو گوندن دارالدیرلار دار قفسیمی
***************
اویانسین كوراوغلی دلیلری بلكه
گئدیب چنلی بئل دن های سالام گرك
قوروسا بوتون چشمه لر چایلار
گوزلریمدن دنیزه چای سالام گرك
****************
باغلی قویمایام بیر قیفیل قالسین
كیلیدین تاپیب من آچام گرك
قفسه سیغینان بیر قوش دئیلم
سیندیریب قفسی من اوچام گرك